Tata Ibadah Bahasa Nias

TATA IBADAH Minggu, 15 Nopember 2020 [Bahasa Nias]

L = Liturgos, J = Jemaat, P = Pengkhotbah

L	:	Ya’ami banua Zo’aya, Ya somuso tödö ba sowuawua tödö ami ba we’amöi föna Keriso ma’ökhö andre, ma’owai ami fefu, Ya’ahowu...!!!
J	:	Ya'ahowu...!!!
L	:	Yafaofao khömi Lowalangi...
J	:	Yafao khöu Geheha-Nia...
L	:	Da ta’owuawua’ö dödöda wangondrasi Yehowa, da ta’omusoi’ö dödöda ba wamalua fasumangeta khö Lowalangida. Tasuno Ia, manunö ita moroi ba Mbuku Zinunö numero:
		264. DOZI ITA FEFU OMUSO DÖDÖDA (G = do)
J	:	Dozi ita fefu, omuso dödöda, tasuno-suno Zo'aya.
		Da ta'osara'ö fefu göi dödöda wangalulu fönaNia.
		Talulu, khöNia, fefu ziso khöda, awö wa'aurida.
L	:	Da tahonogö dödöda ba wariawösa, ba ba wa hasambua khö Lowalangi. Musindro ita fefu...
		No owulo ita ba da’e, ba döi Lowalangi Ama, ba ba döi Nono-Nia Yesu Keriso, ba ba döi Geheha Ni’amoni’ö. Fangorifida ha ba döi Yehowa si no momböi banua si yaẅa awö danö.
J	:	Yaduhu...
L	:	Ba u’ila Zo’aya, sidadao ba dadaoma sebua, si no alawa: anönö gosali ahe mbaru-Nia. Serafi föna-Nia, önö gafi zamösa. Dua mbalubalu mbawa ba dua mbalubalu gahe ba dua ba wehombo. Ba faoma lamanemane we’ao khö nawöra: Ni’amoni’ö, Ni’amoni’ö, Ni’amoni’ö Yehowa ngahönö andrö; no anönö lakhömi-Nia gulidanö ma’asagörö! Haleluya...!!!
J	:	Haleluya... Haleluya... Haleluya...
L	:	Mangandrö ita:
		He Yehowa Lowalangi Ama, Ono ba Eheha Ni’amoni’ö. Möiga mangalulu ba wangandrö saohagölö me no Örorogö, Ö’orifi, ba Öbohouniga fa’omasi-Mö andrö. Ma’andrö khö-U, tohugö wa’ebua dödö-U khöma, rorogöga ba ngawalö de’ala, efa’öga ba wanandraigö, rara dödö ba ngawalö gabula dödö, tundreheni fa böi alau ndra’aga. Fatöröga ba zomasi Ndra’ugö irugi gamozua, fa makhamö nahia ba zi so Ya’ugö. Si lö mo’aetufa nisuno ba nifolakhömi Ndra’ugö, awö Zo’aya ya’aga Yesu Keriso ba Eheha Ni’amoni’ö. Yaduhu!
		Mudadao zato...
L	:	Manunö ita moroi ba Mbuku Zinunö numero:
		273. YA'UGÖ YESU ZOMASIDO (D = do)
J	:	Ya'ugö Yesu zomasido, ba samatörö ya'odo.
		Si no mangeheta ya'odo, ba lala wa'atekiko.
		U'omasi'ö Keriso, sangöhöli ya'o.
L	:	Da tafondrondrongo wombaso Taroma li Lowalangi moroi ba zura...[Fombaso Taroma Li]
		Si manö daroma Li Lowalangi, da tatema’ö faoma sinunö numero: 20. MISUNOSUNO ZO’AYA (F = do)
J	:	Misunosuno Zo’aya, mibe zumange-Nia.
		Mi’ebua'õ dõi-Nia, sotõi banua-Nia.
		Me no Ikaoni gõi ami, afu mitema wa’auri, khö Yesu, Sangorifi
L	:	Ya’ami ira talifusö... Na tawa’ö lö horöda, ba talimo ita, ba si duhu lö’ö ba dödöda. Na ta’ombakha’ö horöda, ba lõ faröi Ia, ba no satulö Ia, fa I’efa’ö khöda horö andrö, Ihaogö ita, awö wa Iheta fefu zi lö atulö. Andrö da möi ita föna Lowalangi si fao fangidengide’ö ba wangombakha horöda. Musindro ita fefu...
		Mangandrö ita... He Yehowa Lowalangi, si lõ ambõ fa’abõlõ, ba si no fahõna fa’omasi. Mafaduhu’ö wa tenga sinangea ndra’aga tanö föna-Mö, me no fahöna horö si no mafalua i’otarai iraono ndra’aga, he ba wehedema, era’era dödöma, awö gamuatama si lö faudu ba daroma Li-Mö. Andrö möiga khö-U ba wangandrö fa’ahakhö dodo-U, ena’ö Ö’efa’ö khöma horöma andrö, si no mafalua, irege sohahau tödö ndra’aga wanohugö fekolima ba zi so fönama si faudu ba zomasi Ndra’ugö. Hakhösi dödö-U khöma Ama, ba be’e aefa khöma horöma andrö ma’afefu, Yaduhu.
		Manunö ita moroi ba Mbuku Zinunö 224. NA UBINI’Ö HORÖGU KHÖ YESU
J	:	Na ubini’õ horõgu khõ Yesu. Ba lõ usõndra zahono dõdõgu.
		U’ombakha’õ ngawalõ horõgu, molala dõdõ
L	:	Turia Wangefa horö: "Utayaigõ golalõwamõ, si mane lawuo, awõ horõu, si mane sau. Tema fuli’õ khõ-Gu, me no U’orifi ndra’ugõ..." Lakhömi khö Lowalangi si yaŵa...
J	:	Manunö moroi ba Mbuku Zinunö numero: 450. BA FA’ATULÖ BA GULIDANÖ
		Ba fa'atulö ba gulidanö, ba niha ni'omasi'ö andrö...
L	:	Mudadao zato...
L	:	Da tafondrondrongo daroma Li Lowalangi, tehalö moroi ba zura...[Fombaso ]
		Ya’ahowu zamondrongo taroma Li Lowalangi ba same’e ba dõdõ...
J	:	Yaduhu...!
L	:	Iada’e tebe’e khöda ginötö ba wolohe fasömbatada khö Lowalangi. Ta’osamuzaigö wame’e, he fasömbata si föföna, ba si manö göi zi mendrua awö zi medölu. Ba si öföna ua da tafondrondrongo Li Lowalangi me imane:"Ba da’õ niwa’õgu: Na so zangatalisi tanõmõ, ba lõ oya’oya ibasi, ba na so zi lõ alimagõ tanõmõ, ba oya gõi ibasi dania. Ba balazi dõdõ zamõsana; bõi abu dõdõ, ba tenga niforege; si no aoha gõlõ fame’e, da’õ sa zomasi Lowalangi." (II Kor.9:7)
		Tafa’ema fõna wasömbata khö Lowalangi, ba manunö ita moroi ba Mbuku Zinunö numero:261. YA’E ZUMANGE
J	:	1. Ya’e zumange fasömbata, maohe sumange Yehowa
		Reff: Ma’andrö khö-U fahowu’ö zumange ni’ohema khö-Mö
		2. Ya’e zumange fasömbata mabe’e soroi ba dödöma
		3. Ya’e zumange fasömbata buala si’otarai Nama
		4. Ya’e zumange fasömbata, boto, noso, ba fa’aurima
		5. Ya’e zumange fasömbata, lö irugi zomasi dödö-U
		6. Ya’e zumange fasömbata, ma’aohasi gölö Zo’aya
L	:	Da tafasao wasömbatada andre föna Lowalangi. Musindro ita fefu...
		(Ira sangai ame'ela mangandrö ba mufa'ema game'ela khö Pendeta) Mudadao zato...
L	:	Da tafa’anö dödöda wamondrongo taroma Li Lowalangi, manunö ita moroi ba Mbuku Zinunö numero: 163. UHONOGÖ SIBAI DÖDÖGU
J	:	Uhonogö sibai dödögu ba wamondrondrongo li-Mö Yesu
		Mangalulu ndra'odo föna-U ba gametahö-Mö ia da'a
		Öbayoini Eheha-U Yesu dozigö mbanua samati khö-U
		Ubokai dödögu khö-U Yesu, nahia daroma li-U
		Taroma li-Mö lö fa'atebulö, menewi, ma'ökhö, ba si'ogötö'ö lö sa mamalö
		Taroma li-Mö Yesu si möi fangabölö, utema'ö soroi ba dödö tolo ba wolo'ö.
P	:	Ya irorogõ dõdõmi, awõ gera’erami fa’ohahau dõdõ andrõ, khõ Lowalangi, sabõlõ moroi ba gera’era niha fefu, ba khõ Keriso Yesu. Mangandrö ita...
		[Fombaso Taroma li, Famotokhi Taroma li]
		[Fangandrö Fondruhö Famotokhi Taroma li]
J	:	Manunö moroi ba Mbuku Zinunö numero: 154. NO MAFONDRONDRONGO LI-U
		No mafondrondrongo li-U, Lowalangi So’aya
		Tanõ ba dõdõma ia, fa bõi olifuga
		Fahowu’õ ia khõma ena’õ ohahau dõdõma fefu
		Heta ba dõdõ zi lõ sõkhi ma’o’õ ni wa’õ-U.
L	:	Me no tarongo daroma Li Lowalangi, ba da tafaogö lida wamaduhu’ö famatida ya’ita niha Keriso föna Lowalangi. Musindro ita fefu... Endronga lida:
		Ya’o mamati khö Lowalangi Ama si lö ambö fa’abölö, somböi banua si yaẅa awö danö.
		Ya’o mamati khö Yesu Keriso, So’aya ya’ita, Ono Lowalangi si ha samösa, nitema nina-Nia Maria khö Geheha Ni’amoni’ö, ono nono alawe Ia, no manaögö huku Ia, barö mbawa Fondrio Filato, teforöfa Ia, mate, ba lako’o. No möi Ia ba mbanua niha tou, no maoso Ia moroi ba ngai zimate me no irugi tölu ngaluo. No manahae Ia, möi ba zorugo, dumadao ba gambölö Lowalangi Ama si lö ambö fa’abölö. I’otarai da’ö mangawuli Ia dania ba wanguhuku niha sauri, awö zi no mate.
		Ya’o mamati khö Geheha Ni’amoni’ö, ba ufati ha sambua mbanua ni’amoni’ö, fefu niha Keriso, fa’awösa niha ni’amoni’ö, ba fangefa horö, ba femaoso mboto zimate, ba fa’auri silöaetu. Yaduhu.
		Mudadao zato...
L	:	Manunö ita moroi ba Mbuku Zinunö numero: 148. HE YA'ITA SAMONDRONGO (F = do)
J	:	He ya'ita samondrongo, taromali Zo'aya.
		Tafonaha ba dödöda, ba ta'o'ö liNia.
		Sangoroma'ö lala, ba wanöndra aurifa.
P	:	Musindro ita fefu... Mangandrö ita
		[Fangandrö salahi... Tetohugö: Ba döi Zo’aya ya’aga Yesu Keriso, si no mamahaö ya’aga ba wangandrö mamane:]
		He Ama khöma si so ba zorugo, ya te’amoni’ö döi-U. Ya tobali banua-U fefu niha, ya itörö zomasi Ndra’ugö, hulö ba zorugo, ya si manö göi ba gulidanö. Öma sirugi ma’ökhö be’e khöma ma’ökhö andre. Ba efa’ö khöma horöma, si mane fangefa’öma sala ba zi so sala khöma. Böi ohe ndra’aga ba wanandraigö, efa’öga ba zi lõ sõkhi. Me ya’ugõ zamatõrõ banua-U, ba sokhõ fa’abõlõ, awö lakhömi, irugi zi lö aetu. Yaduhu!
P	:	Mi’angawuli sifao fa’ohahau dödö, yatobali ami sura Keriso, samaduhu’ö Ya’ia ba lala wa’aurimi sero ma’ökhö, ba mitema howuhowu Lowalangi:
		Ya mufahowu’ö ami Lowalangi, Ya murorogö ami;
		Ya mufohaga mbawa-Nia khömi, Ya mu’ebua’ö dödö-Nia khömi;
		Ya mufalemba hörö-Nia khömi, Ya mube’e wa’ohahau dödö khömi fefu. Yaduhu!
J	:	Manunö moroi ba Mbuku Zinunö numero 265. SÖKHI NA FEFU ITA (Es = do)
		Sökhi na fefu ita, ha sara dödöda.
		Atulö zamösana, ita khö nawöda
		Atulö zamösana, ita khö nawöda
P	:	Ya'ahowu...!!!
J	:	Ya'ahowu...!!!
		*** Ibadah Selesai ***

Share: